Расійскі музычны крытык і тэлевядоўца Сяргей Саседаў памёр у выніку цяжкай траўмы галавы і кровазліцця ў мозг, піша Msk1.ru са спасылкай на арганізатара фестывалю «Жемчужина Дальнего Востока» Віктара Бяззубава.
Саседаў памёр 23 верасня ў якуцкім горадзе Нерунгры, куды прыехаў для ўдзелу ў фестывалі «Жемчужина Дальнего Востока» ў якасці сябра журы. Яму было 58 гадоў.
Арганізатар мерапрыемства Віктар Бяззубаў паведаміў, што блізкім ужо выдалі заключэнне пра смерць.
«Вынікі экспертызы: траўма галавы, пералом асновы чэрапа і кровазліццё ў мозг», — паведаміў ён.
Раней маці Саседава расказала, што яе сын атрымаў траўму галавы ў гатэлі ў Якуціі:
«У гатэлі па лесвіцы спускаўся, упаў, пашкодзіў галаву. Выклікалі хуткую, на аперацыі памёр. Жах нейкі».
Цела крытыка збіраюцца адправіць з Нерунгры ў панядзелак, 28 верасня. Дата пахавання пакуль невядомая.
Сяргей Саседаў нарадзіўся ў 1968 годзе ў Маскве. Працаваў музычным журналістам, быў вядоўцам праграмы «Акулы пера» на ТВ-6, уваходзіў у журы ўкраінскага X-Factor, а таксама расійскіх праектаў «Суперстар!» і «Ты — суперстар!». У апошнія гады вёў ток-шоу «За гранью» на НТВ.
Сяргей Саседаў і забарона (і яго адмова) прыязджаць у Беларусь
Крытык шмат гадоў ездзіў на «Славянскі базар» у Віцебску і, паводле ўласных словаў, пабываў на фестывалі каля 20 разоў — упершыню яшчэ ў 1999 годзе.
У 2021 годзе, за дзень да чарговай паездкі ў Віцебск, крытык даведаўся, што яго выключылі са спіса акрэдытаваных журналістаў і забаранілі ўезд у Беларусь. Саседаў мусіў асвятляць фестываль як прадстаўнік расійскага агенцтва InterMedia і на той момант ужо атрымаў акрэдытацыю. Прычыны рашэння беларускія ўлады яму не растлумачылі.
Сам Саседаў у размове з «Люстэркам» звязваў забарону з палітыкай і сваёй адмовай працаваць у беларускай версіі X-Factor. Паводле яго, Белтэлерадыёкампанія запрашала яго стаць настаўнікам і сябрам журы шоу, аднак ён адмовіўся пасля спрэчак пра ўмовы і ганарар, а таксама пасля аповедаў знаёмых пра сітуацыю ў краіне пасля пратэстаў 2020 года.
«Гэтыя гісторыі мяне вельмі ўразілі. Паколькі чалавек я вельмі шчыры, прынцыповы і не ўмею маўчаць, калі мяне нешта абурае, падумаў, што мне ў Беларусі капец. Што там магу і ў жывых не застацца, і не знойдзе потым ніхто, дзе я. Там жа небяспечна выходзіць на вуліцу!» — казаў ён.
Пасля забароны на ўезд Саседаў заявіў, што больш не прыедзе ў Беларусь «ні на якія фестывалі, ні на якія праграмы, пакуль будзе гэтая ўлада»:
«Нагі маёй не будзе ў Беларусі! Мне вельмі шкада краіну і беларусаў. Гэтых цудоўных людзей — чыстых, наіўных, вельмі даверлівых, якія сталі ахвярай жудаснай тыраніі».
Саседаў падтрымаў анексію Крыма і расійскае ўварванне ва Украіну, за што быў унесены ў базу «Міратворац».